Angeles del Infierno beteranoak Donostiara itzuliko dira 2025ean

Argitu da zein izango den 2025eko udan Anoeta futbol zelaian egingo den laugarren kontzertua. Realaren akziodunen azken batzarreko aktak jasotzen duenez, Ángeles del Infierno da iragartzeko falta den taldea, eta uztailaren 5ean ariko dira zuzenean.

Beste hiru kontzertuak dira Fermin Muguruzak —ekainaren 14an— eta Bruce Springsteenek —ekainaren 21ean eta 24an— eskainiko dituztenak. Laugarrena Quevedo izan zitekeela zabaldu zuten hainbat hedabidek, baina ez da horrela izango.

Euskal Herriko heavy metalaren talde aitzindaria da Ángeles del Infierno. 1978an elkartu ziren Lasarte-Orian, eta 1980eko hamarkadan zeresana eman zuten Pacto con el diablo, Diabolicca, Joven para morir eta 666 diskoekin. Donostian hainbatetan aritu ziren belodromoan, baina urte asko pasatu dira azkenekoz Euskal Herrian aritu zirenetik.

2003an Todos somos ángeles estudioko azken diskoa kaleratu, eta AEBetara joan ziren bizitzera. Gaur egun, Hego Amerikan eta Ipar Amerikan dabiltza kontzertuak ematen. Musikariei dagokienez, soilik bik jarraitzen dute hasieratik: Juan Gallardo (ahotsa) eta Robert Alvarez (gitarra).

Pasa den urrian emandako kontzertu bateko bideoa ikus dezakezue jarraian:

Oharra: Inozente eguneko albiste bat da.