Anker bandak garai baten amaiera iragarri du ikus-entzunezko batekin

Legazpiko Anker heavy/thrash metal taldeak Garai baten amaiera izenburua jarri dio Oñatin eskainitako eta grabaturiko kontzertuari. Hain zuzen ere, emanaldi hura "oroitzapen berezia" izatea nahi dute, 2024ari bukaera emateko.

Zehazki, azaroaren 9an izan zen kontzertua Oñatiko Gaztelekuan, eta Anestesia beteranoen gonbidatu gisa aritu ziren. Ikus-entzunezkoa Aimar Ibarzabalek (Ilun Produkzioak) editatu du, eta jarraian ikus dezakezue:

Laukoteak honela aurkeztu du zuzenekoa: "2024. urtea oso emankorra izan da guretzat eta ederki pasa izan dugu oholtza gainean zuekin batera burua astinduz! Eskerrik asko urte osoan zehar ezagutu ditugun pertsona zoragarri guztiei, zuekin batera bizitako momentu, anekdota, barre eta afari ahaztezin hoiengatik. Esker bereziak, beti gurekin batera hor zaudeten guztioi. Garai baten amaiera da... garai berri baten hasiera". Datorrena beraiek argituko dute.

Gipuzkoarrek iazko urrian kaleratu zuten Lurperatutako istorioak bigarren diskoa: