Estudioan: Hortzak, Lotura, Lee Kore eta Hoben

Labe garaiak oraindik baditugu Euskal Herrian. Horiek dira metal taldeen doinuak grabatzen dituzten estudioak. Urte osoan daude zabalik, eta banda hauek ez dute aukera hori galdu nahi izan:

Euskal Herriko Hortzak sludge metal taldea bigarren diskoa grabatzen hasi da Bergarako Auryn Studios-etan. Heriotza ala Hil estreinakoaren jarraipena izango da. Paul Urkijo zinemagile eta abeslari gasteiztarraren banda da.

Bizkaiko Lotura alt metal banda buru-belarri dabil lan berria grabatzen, Fruizko Gaua estudioan. Horretarako, laukotea osatu duen Sebas Limongi (Morphium) bateria jotzailea fitxatu dute. Iaz, Erantzunaren zain lan laburra kaleratu zuten.

Oñatiko Lee Kore eta Zumaiako Hoben taldeek lan elkarbanatu bat grabatu dute Zumaiako Ozen estudioan. Bi bandek gustuko dute hardcorea eta metala uztartzea, eta dagoeneko iraupen luzeko disko bana dute. Oñatikoek aurten plazaratu dute Maitasuna ta Askatasuna diskoa, eta Zumaiakoek iaz argitaratu zuten Amets gaiztoa izenekoa.