Kruddö bikoteak galdera existentzial bat egin du

Bizkaiko Kruddö stoner metal taldeak Nork esaten du? single berria plazaratu du. Etxekalte taldeko Unai Irisarri musikariak parte hartu du, eta emaitza pausatuagoa da. 

"Gure maitatuek Lurran utzitako aztarna ahaztu arte, nork esaten du gurekin ez daudenik?", dio bikoteak. Galdera existentzial horren ingurukoa da kanta. 

Nintzen azken lanaren antzera, Iñigo Eskauriazarekin grabatu dute El Submarino Records estudioan.

Kruddö banda 2021ean sortu zuten Jon Ander Santa (Cäctus) eta Txaber Miravalles (Niketz) musikariek. Stoner eta metal melodikoa nahastera ausartu ziren bikote moduan. Ez dute beldurrik doinu eta estilo berriak jorratzeko. Beraien hitzak, berriz, komiki, film, telesail, mitologia eta literaturan oinarrituta daude, betiere gizartean ematen diren arazoetan eta konplexutasunetan konpromiso bat hartuta. 2021ean Iluntasunetik Argira lehen lan laburra kaleratu zuten. Aldiz, 2023an argitaratu zuten Nintzen bigarren lan laburra.