Latzen bueltan da!

Oñatiko Latzen heavy/thrash metal taldeak zurrumurru guztiak uxatu ditu, eta bueltan direla iragarri dute. Hamazazpi urteren ondoren, Lakuntzako Hatortxu Rock jaialdi berezian itzuliko dira taula gainera. Uztailaren 24tik 27ra bitartean izango da, eta beste hainbat talderekin batera ariko dira.

Gainera, laukotea berrituta bueltatuko dira. Aitor Uriarte (ahotsa eta gitarra), Gorka Lazkano (bateria) eta Joxemari Azpitarte (baxua) musikariekin batera, beste gitarrista bat ariko da aurrerantzean: Yerko Ortiz (Dirty Shadow ohia) legazpiarra. Iker Martinez de Zuazo gitarristak utzitako lekua hartu du.

Iazko azaroan, Herriko Burdina webgunean jakinarazi genuen Heriotzari deika estreinako maketa eta Hellmuga zuzeneko diskoa plataforma digitaletara igo zituztela. Esanguratsua iruditu zitzaigun, eta, orain, aurrekari moduko bat izan zela baieztatu dugu. Hain zuzen ere, 30 urte bete dira oñatiarrek maketa hura kaleratu zutenetik.

Latzen lau gaztek osatu zuten, 1993. urtean: Aitor Uriarte (ahotsa eta gitarra), Gorka Lazkano (bateria), Joxemari Azpitarte (baxua) eta Iker Martinez de Zuazori (gitarra). Esan moduan, Heriotzari deika maketa 1995ean plazaratu zuten. Gerora, bi disko argitaratu zituzten: Kontzientzia ala infernua (Oihuka, 1996) eta Ardi larruz (Oihuka, 1998). Sekulako arrakasta lortu zuten lehenarekin, besteak beste, Laztana baladari esker. Dena dela, 1999ko abuztuan banda desegitea adostu zuten, hirugarren diskoa grabatzear zirela.

2007ko urriaren 2an, Infernuko ateetan azken kontzertu bira iragarri zuten, eta 15 emanaldi eskaini zituzten Euskal Herriko hainbat herritan. Tartean, Eskoriatzakoa grabatu, eta 2008an, Hellmuga izeneko zuzeneko disko eta DVDa argitaratu zuten. Ondoren, lan berria aurkezteko beste zenbait kontzertu jo eta Latzen behin betiko lozorroan sartzea erabaki zuten.