Gojira taldeak 2026an argitaratuko du lan berria

Baionako Gojira laukotearen ibilbideko zortzigarren diskoa gero eta gertuago dago. Mario Duplantier bateria jotzaileak elkarrizketa batean aurreratu duenez, 2026an argitaratuko dute lan berria. Gogoratu behar da Fortitude orain arteko azken diskoa 2021ean kaleratu zutela.

Duela gutxi, Ingalaterrako Bloodstock Open Air jaialdian aritu ziren lapurtarrak, eta Bloodstock TV-ko Oran O’Beirnerekin hitz egin zuen Duplantierrek.  Blabbermouth.net atariak transkribatu du solasaldia, eta pasarte batzuk euskarara ekarri ditugu:

"Dagoeneko bateriaren, gitarren eta baxuaren grabazio batzuk egin ditugu. Denbora asko behar izan dugu. Denbora hori behar genuen, uste dut, denok maila berean gaudela ziurtatzeko, Gojirak dakarrena nahikoa indartsua dela ziurtatzeko. Gainera, ez dugu presio handiegirik, dagoeneko ez garelako hasiberriak. 30 urte daramatzagu talde gisa, eta sendotasuna lortu dugu. Horrek ez du esan nahi alferrak izan gaitezkeenik, baina oso erabakigarria da zerbait berria eta indartsua aurkezteko denbora hartzea".

Gogoratu behar da Gojirak Parisko Olinpiar Jokoen inaugurazio ekitaldian parte hartu zuela, 2024ko uztailaren 26an. Mea Culpa (Ah! Ça ira!) izeneko abestia eskaini zuten, Marina Viotti mezzo sopranoarekin batera. Frantziako Iraultzako Ça Ira pieza herrikoiaren moldaketa da. Horretarako, Victor Le Masne konposatzaile eta ekoizlearen laguntza izan zuten. Emanaldi horren harira, Metal Ikuskizun Onenaren Grammy saria jaso zuten otsailean, Los Angelesen (AEB).