Kruddö bikoteak erraietatik askatu du 'Kill me' abestia

Bizkaiko Kruddö stoner metal taldeak Kill me kanta berria aurkeztu du. Bikoteak autoekoiztu du, "erraietatik eta gordinik baino gordinago".

Beraiek grabatu eta nahastu dute, eta Victor Garciak egin du masterizazioa Ultramarinos estudioetan. Bideoklipaz, berriz, Txaber Miravalles (El Conserje del Universo) abeslaria eta gitarrista arduratu da.

Apirilaren 7tik aurrera plataforma digitaletan entzun ahal izango da. 

Kruddö banda 2021ean sortu zuten Jon Ander Santa (Cäctus) eta Txaber Miravalles (Niketz) musikariek. Stoner eta metal melodikoa nahastera ausartu ziren bikote moduan. Ez dute beldurrik doinu eta estilo berriak jorratzeko. Beraien hitzak, berriz, komiki, film, telesail, mitologia eta literaturan oinarrituta daude, betiere gizartean ematen diren arazoetan eta konplexutasunetan konpromiso bat hartuta. 2021ean Iluntasunetik Argira lehen lan laburra kaleratu zuten. Aldiz, 2023an argitaratu zuten Nintzen bigarren lan laburra. Azkenik, iazko azaroan, Nork esaten du? singlea plazaratu zuten.