When Evil Comes laukoteak 'My Fault' abestia estreinatu du

Gasteizko When Evil Comes metalcore taldeak laster plazaratu du Reach the Dawn bigarren diskoa. Laukotea berritu eta osatu osteko lehen argitalpena izango da.

Bi dira dagoeneko aurreratu dituzten abestiak, eta hauxe duzue bigarrena: My Fault. Andrew Garciak zuzenduriko bideokliparekin aurkeztu dute.

Aurretik, (No) Hope kanta estreinatu zuten.

Lan berria Sebastian Sendon soinu ingeniariak nahastu eta masterizatu du.

Duela gutxi, Alvaro Foronda (Childrain ohia) gitarrista berriaren fitxaketa iragarri zuten. Hain zuzen ere, laukote gisa itzuliko dira agertokietara. Azaroaren 22an Bilboko Santana 27 Blue aretoan ariko dira, eta abenduaren 21ean Gasteizko Helldorado aretoan.

Minerva izenpean elkartu ziren 2015ean, eta lan labur bat kaleratu ondoren, When Evil Comes izatera pasa ziren 2020an. Inner War iraupen luzeko lehen diskoa 2021ean kaleratu zuten. Orduan boskotea ziren. Dena dela, betidanik, eta, batez ere, azken urteotan, taldekide aldaketa ugari izan dituzte.